PARAS KAMPUNGKU

Paras Jaman Sakiki

Paras aran satunggale padukuhan ing wilayah sisih wetan Kelurahan Banjarasri Kalibawang Kulon Progo. Kalibawang mono kecamatan ing laladan kabupaten Kulon Progo sing paling lor dhewe, lan winates kali Progo. Sisih lor kali Progo wis klebu kukuban Caruban Ngluwar Magelang. Menawa padha tumuju Muntilan kudu nitih motor utawa mobil 15 km, mengkono uga menawa arep tindakan Candi Borobudur.

Paras ana ing 7.708865 lintang selatan lan 110.234708 bujur timur, Ing sisih wetan lan kidul minangka laladan kang kebak sawah, dene sisih elor laladan ing pegunungan Menoreh. Ana rong RW lan saben RW duwe rong RT.

Paras Jaman Biyen

Paras mono biyene jeneng kelurahan kang mbawahi Paras, Kepiton, Kisik, Dukuh, Tlagan lan Bacok (sakiki Ganasari). Paras jaman biyen kalebu papan kang ora subur, amarga ora duwe sumber banyu dhewe. Papan kang subur ming Pulo - yaiku tegalan utawa sawah kang ana ing pinggire kali Progo. Mulane jaman biyen wong kang duwe tegal lan sawah ing Pulo kalebu wong kang sugih lan pinunjul ing babagan bandha.

Sak perangan gedhe wong paras dadi buruh, utawa bakulan. Biyen uwong-uwong iku during duwe lemah dhewe. Kabeh lemah kagungane Sultan Ngayogyakarto. Kabeh diawasi lurah lan lurah oleh njaluk utawa jipuk apa wae kang ana ing kebon, tegal lan sawah. Umpama ana kayu nangka (gori) kang gedhe, kayu kang apik sisik ngisor kanggo lurah, dena rakyat umum ming dibagehi pucuk-pucukke wae. Dadi pancen arang wong umum kok duwe omah kang apik.

Asmane mBah Lurah Paras

Miturut mbah Saeran Partosuwarno (rikala Idul Fithri tahun 2011), asma cilice mbah Lurah iku Bardo. Mbok menawa mbah Lurah lahir sak bubare Idul Fithri. Awit Bardo iku bisa singkatan seka bubar bada   - bubar riyaya, bubar Fithri. Dene asma sepuhe Partodikara utawa Sopawiro.

Miturut pangandikane pak Supardiharjono, jere asmo Sopawiro iku asma kang diparingake dening bapakke mbak Lurah rikala nikah karo garwa kang sapisan kang asma mbah Sir. Asmane mbah Sir iki uga ora padha dimangerteni. Awit asma Sir iki, asmane putrane mbah Lurah seka garwo sepisan iki. Sak banjure rikala diangkat dadi lurah asmane ganti dadi Partodikoro.

Ananging ana uga sak perangan kang mratelakake menawa Partodikoro kuwi asma rikala diangkat dadi lurah lan sak banjure ganti jeneng dadi Sopawiro rikala nikah karo garwa angka papat yaiku mbah Biyah.

Asal-Usule mBah Lurah Paras

Miturut pangandikane Pak Supardiharjono, mbah lurah iku asal-usule seka Kaliwuluh. Kaliwuluh mono saiki laladan cilik kang dumadi seka limang omah kang isih sak seduluran. Kaliwuluh klebu ing wilayah pedhukuhan Kanoman Banjararum Kalibawang. Ananging uga ora dimangerteni asma wong tuwane mbah Lurah iki. Jare isih sedulur kara mbah-mbahe pak H. Sukapdi Siswopranoto (bapakke bu Tri Hartini, garwane pak H. Sumanto SH, Proboharinto, Proboharjito, Sapto Hari Nugroho), lan Sukapjo. Aku uga wis tahu nyuwun pirsa marang pak Saeran Partosuwarno lan piyambake ngendika menawa mbah Lurah pancen seka Kaliwuluh.

Wektu Lahir lan Sedane

Ora ana wektu kang gumathok kapan mbah Lurah lahir. Ananging jarene mbah Lurah seda kanthi yuswa kira-kira wolung puluh - wolung puluh limanan lan seda tahun 1951, dadi kira-kira mbah Lurah lahir ing tahun 1870 - 1880an. Ana cerita kang aneh rikala mbah Lurah arep seda.

Mbah lurah seda ora amargo gerah ananging pancen amarga wis sepuh. Sing baku mbah Lurah iku jare piyantun kang ampuh. Menawa dipirsani simbah, uwong-uwong banjur dhingkluk ora wani ngetke mbah Lurah. Jare paningale kuwi mencorong. Kuwi kabeh amarga aji-aji lumbu sekilan lan aji-aji welut putih (ning awake dhewe ora oleh lo duwe aji-aji, syirik). Bab iki diakoni dhewe dening mbah Lurah sakwetara dina rikala arep seda.

Rikala semana ing daleme wis dha kumpul sanak kadang tangga teparo nunggu mbah Lurah rada gerah mriyang. Ujug-ujug mbah Lurah ngendika karo pembantune, “Yem, aku ngelih, jikokna sega.” Sak uwisi sega dicepakke mbah Lurah dhahar sethithik banjur para kadang kang ana daleme mbah Lurah iku didulang kabeh dening mbah Lurah senajan to ming sethithik-sethithik.

Rampung anggone ndulang, mbah Lurah ngendika, “Padha disekseni yo para kadang, lan anak-anakku kabeh. Aku wis tuwa, badanku wis ringkih. Saiki wis ora kuat kepanggonan aji-aji ....... Mula wiwit saiki, aku wis ngeculka apa wae kang ana awakku.” Bubar kuwi mbah Lurah sare lan sak wetara dina sebanjure banjur seda. Iki kedadean ing tahun 1951.

Diangkat Dadi Lurah

Sak durunge dadi Lurah, mbah Lurah kagungan pangkat bekel - menawajaman sakiki mbokmenawa sak tingkat karo jabatan dukuh. Ing tahun 1906, Bardo utawa Partodikoro diangkat dadi lurah. Laladan kang kasebut kalurahan Paras yaiku Kepiton, Kisik, Tlagan, Dukuh, Bacok (saiki kasebut Ganasari, tetenger paringan Sri Sultan Hamengkubuwono kaping sanga) lan Paras.

Menawa ora kleru ing tahun 1925 jabatan lurah diwarisake marang putra mantune kang asma Notosiswoyo (menawa pak Supardiharjono, nyebut Anis). Notosiswoyo iku garwane mbok Tentrem putrane mbok Sir kang lenggah ing Kepiton.

Tahun 1930 jabatan Lurah dijaluk pamarintah Hindia Belanda banjur dianakake pilihan rakyat kang dimenangake dening mbah Dwijomartono kang lenggah ing Kisik. Mbok Tentrem banjur pindah nang Gading cerak Kraton Ngayogyakarto lan putra-putrane dadi pengusaha bathik kang pinunjul lan kasil.

Tetenger Banjarasri

Tahun 1947-1948 ana kawicaksanan anyar maneh. Kalurahan Paras digabung karo kalurahan liya. Mbah Lurah Dwijomartono kudu ngeculke jabatan lurah, lan menawa kersa, didakke (nek cara saiki) kepala bagian/urusan social. Ananging bab iki ditolak dening mbah Dwijomartono. Akhire dianakke pilihan lurah maneh, pranyoto mbah Dwijomartono kalah.

Tahun 1947 kalurahan Paras digabung karo kalurahan Boro, hasil pemilihan kang menang mbah Lurah Brojo...... Gabungan rong kaluruhan mau tengeri Kalurahan Banjarasri. Lan salah sijine putrane mbah Lurah Partodikoro kang asma Wongsodikoro dianggkat dadi Romo Aman (urusan pemerintahan). Emane setahun dadi Romo Aman, mbah Wongsodikoro kapundhut dening Allah subhanahu wata’ala.